|
收到一只微信，微友吼势煞了【窝火极了】：有位主持人垃拉主持节目个辰光讲自家有得摒勿牢会得讲出上海闲话个“陋习”！微友难过煞了，伊微信浪讲连得媒体人也搿能介对待本地方言，葛末上海闲话只好迓拉屋里向讲了咾。 现在上海电视讲上海闲话个节目已经老早突破了零汤团，勿但有，而且比开始辰光多了，就电视来看，每天有得舒悦茄山河、阿庆讲故事、哈哈笑餐厅3档，还有每礼拜一趟个王汝刚个大家帮侬忙告新闻坊个沪语新闻，不过侪只有播出一趟，可以讲比勿过无锡。无锡电视台礼拜一到礼拜日每日天开5档方言节目，有得一清早开播早中夜播三趟家长里短新闻个“阿福聊斋”、有得10点多开始中浪夜到播两趟个“阿福讲故事”，有得市民参与演出中浪夜头播两趟个20分钟情景剧“大话阿福”，有得中浪夜头播两趟个夫妻道里扯当天新鲜事体个“扯扯老空”，还有七点多钟个天气预报叫“啥天气”。除脱天气预报、方言剧，每档侪有个把钟头。搿几档节目内容新鲜，话题蛮多，形式活泼，语言生动，特别有趣。还有小朋友主持采访小朋友，小朋友之间侪会得老熟练个讲无锡闲话。无锡人欢喜看，到无锡去个上海人也欢喜看。特别是阿福聊斋个收视率一直蛮高。——大家看搿能介有得几化好！城市变新了、房子变大了，葛当然是开心个，不过垃楼房里向邻里之间来去少了，讲方言个机会少了，大家心里向总归觉着缺眼啥，仍旧勿大适意。无锡电视台晓得无锡人个心思，从一开始个大阿福到现在个5档方言节目，勿光是弥补了无锡人心里向个缺失，丰富了无锡人个精神生活，让无锡人觉着伲就生活垃拉无锡迭块地方，而勿是搬到了别场化【别的地方】。电视里跟日常生活当中一道讲方言，葛末无锡闲话就勿会得冷清下来。 上海个人口规模超过了2300万，搿当中会得讲上海闲话个人数恐怕要超过无锡现在个全部人数。老早讲起来无锡咾啥侪算“小码头”，现在“小码头”每日天电视里向开得出足足5档方言节目，阿拉“大上海”哪能沪语节目数量跟播出次数辰光侪要比无锡少呢？ 方言是一个城市个文化血脉，时代变化了，方言也当然会得有变化，不过勿可以变得勿讲了、勿准许讲了、呒没地方讲了——无锡个做法已经启发阿拉，方言是可以垃现在存在下去个，垃搿个过程当中，勿关是传承还是传播，是保护还是激活，媒体个作用还是少勿脱个，因为现在看电视个人还是为数众多，电视个影响力还是相当大个。电视节目讲方言，勿但可以，也是必要个，而且还是受欢迎个。照老脑筋看，好像方言是老个，电视是新个，实际浪向电视讲方言，也是与时俱进——是突破电视勿讲方言束缚个一种面向大众个进步，是对观众当中喜欢听方言个一部分人个尊重。对地方媒体来讲，跟当地人讲一样个方言，起码是地气接着了，起码是地方个特征有眼了，是眼睛里向有得观众了。假使勿是搿能，无锡为啥要日日开5档节目呢？无锡开得出，葛末上海为啥开了介少呢，又排了介少呢？要是苦于会得讲上海闲话个播音员忒少，葛末可勿可以公开多招聘几个呢？ 整个吴方言区个方言都到了需要一些“杠杆化”动作加以支持个境地，无锡个做法很可为上海借鉴。保护沪语将是本版一直关注个话题，欢迎读者朋友继续来稿谈谈侬个好想法脱仔建议。——编者 (责任编辑：admin) |