闲话上海闲话里个“儿”
http://www.newdu.com 2024/11/24 04:11:39 新民晚报 郭晔旻 参加讨论
大家侪晓得,“儿”辣拉北方话里向,做单字解释是“儿子”个意思,辣词语末脚闲话是儿化韵。其实,迭两只用法,上海闲话里也侪是有个。 有种人觉得,上海闲话喊儿子明明是“尼”子嘛!写下来忒勿像样,还是只好用北方话个“儿”将就将就了。迭个实在是误会,“儿”迭个字辣拉上海闲话里向,本来就是有“尼”个读法,外加也是有来历个,老祖宗就是迭能讲法。勿相信个说法,侬可以看看繁体字个写法,“倪”个声旁做啥是“儿(兒)”呢? 再来讲讲词尾个“儿化”。当然,啥花儿马儿个讲法,上海闲话是呒没个,勿单上海闲话呒没,隔壁个苏州闲话,长江对过个崇明闲话咾啥也侪看勿到迭个用法。周边地区个方言也就是杭州闲话里向个“儿”多了木佬佬,像经典滑稽段子《十三个人搓麻将》里就有一大串杭州话个儿化词,外加杭州闲话个儿化个读法,也是跟北方话一式一样,拿舌头卷起来要顶到天花板快了。 其实,上海闲话也是有“儿化”个。只不过上海闲话里向个“儿化”勿是拿舌头卷起来,而是读成一个自成音节个鼻音ng,跟“五”“鱼”个读法是一样个。上海闲话拿“女儿”喊成“囡ng”,其实就是“囡”字后头跟了一只“儿化”。更加有意思个是,“囡”迭只字,按照语言学家潘悟云个考证,其实本身就是“女儿”个合音!只不过辰光一长,鼻音脱落以后大家侪勿晓得了,告咾帮伊造了一个“囡”字,后首来又重新加了儿化变成“囡儿”了。寻根问底闲话其实应该写成“女儿儿”——当然啥人也勿会迭能写,看看也是蛮戆个。 像囡一样个“儿化”留辣上海闲话里向还有好几个字,统统侪是大家已经根本觉勿着个。譬方“虾”,有种读法是“欢”,其实就是“虾儿”;老宁波带到上海闲话里向个“老头浜”,写出来是奇怪来西,外地人看勿大懂,但拿“浜”迭个音还原回去,本来个写法其实是“老头伯儿”,人人侪看得懂;小鬼头叫“小畏”(也是从宁波闲话借来个),又勿是小人让人吓(畏惧)个意思,也是跟“虾”一样,是“小娃儿”演变过来个。 像迭种看上去让人有眼稀里糊涂个字,考证一记“儿化”,其实侪蛮清爽。 (责任编辑：admin) |